monumenta.ch > Hieronymus > sectio 31 > XVIIII. UNIVERSIS GOTHIS ET ROMANIS VEL HIS QUI PORTIBUS VEL CLUSURIS PRAESUNT THEODERICUS REX. (a 507/511)
Cassiodorus, Variae, LIBER SECUNDUS, , XVIII. GUDILAE EPISCOPO THEODERICUS REX. (a. 507|511) <<<     >>> XX. VVILIGIS SAIONI THEODERICUS REX. (a 507/511)

Cassiodorus, Variae, LIBER SECUNDUS, XVIIII. UNIVERSIS GOTHIS ET ROMANIS VEL HIS QUI PORTIBUS VEL CLUSURIS PRAESUNT THEODERICUS REX. (a 507/511)

1 Cuncta quidem iure detestamur scelera et omne quod iniquum est clemens execratur auditus, sed ea maxime quae, humani sanguinis effusione polluta, nostram contra se incitavere censuram.2 quis enim ferat in domesticis praesidiis locum fuisse periculis et ibi inventum dulcis vitae exitum, unde nasci debuerat defensionis auxilium? Et ideo praesenti iussione mandamus, ut in famulos, qui Stephanum dominum suum plectibili scelere trucidantes inhumatam quoque reverentiam eius funeris abiecerunt, legum districtione resecetis, quatenus qui exemplis provocantur pessimis, poenis arceantur aspectis.3 pro dolor! pietas in avibus invenitur, quae ab humana condicione deseritur.4 Vultur ipse, cui vita est cadaver alienum, tantae magnitudinis corpus, nec exiguis alitibus probatur infestus, sed magis accipitrem, vitam plumigerum avium persequentem, alis caedit, ore dilaniat totoque suo pondere periclitantibus nititur subvenire: et homines parcere nequeunt, cuius se genus esse cognoscunt.5 ille non vult extinguere quo poterat vesci: servi maluerunt occidere qui eos superstes consueverat enutrire.6 fiat ergo pastus pii vulturis, qui necem potuit crudeliter desiderare pastoris.7 tali potius sepulcro recipiatur, qui dominum reddidit insepultum.Cassiodorus HOME
bnf2923.154